Liena Palazios, nueva Presidenta d’Estau Aragonés.


capturaEstau Aragonés ha zelebrau a suya Asambleya Cheneral, aplazada por a pasa dende marzo. Por as zercunstanzias, no ha puesto fer-se con a presencia de toz os suyos afillaus, asinas que diez delegaus, pa no incumplir a normativa, s’han achuntau en Zaragoza pa endrezar o camín de o partiu enta os veniens cuatre años.

Dezaga d’un debate por medios eleutronicos d’istos meses, s’han aprebau os Estatutos u Ordinazions, con cambeos importans en o funcionamiento interno de o partiu, que agora s’organiza como una federazión de comarcas.

Tamién s’ha aprebau una “Declaración Política” que fixa os prenzipios ideolochicos, oxetivos políticos y endrezeras estratechicas a largo plazo, será publicada ascape en iste blog.

De camín, s’aprebó una resoluzión refirmando la Compleganza endrezada en iste tiempo por a Chunta Direutiva, conforme lo alcordau en l’asambleya de 2016 y o Consello Federal de 2019,  con atrás collas, esviellando lo mandato ta “parar as aczions y actividaz conchuntas con a resta de coleutivos y organizazions embrecaus con a Compleganza, que pleguen en a presentación de candidaturas de conchunta enta las eleczions munizipals y autonomicas previstas pa 2023″

Tamién se trigó a la resta de la Chunta Direutiva, con R. Fleta de Secretario Cheneral, J. Calvo de Secretario d’Organizazión y M. Forcada de Tresorero; y a Maya de Conflictos, con A. Castro, G. Camallonga y L. Alarcón.

Pa rematar, a nuestra nueva Presidenta mos dizió istas parolas:

EMPEZIPIAMOS UNA NUEBA PASA

O Presidén nuestro, Andrés, ha rematato o suyo tiempo que legalmén ye establiu por os nuestros Estatutos. A faina que ha feito por Estau Aragonés y por l’aragonesismo, ye prou gran, tot conoxemos como luita por Aragón, dende toz os puestos en os que li baga. A nueba chunta direutiba queremos continar con ixe espritu luitador,

En istos meses solo que se fabla d’ista pasa clamata COVID, y muitos dreitos y libertaz d’os ciudadanos son trestallatas por custions sanitarias, en o politico solo se fabla de centralismo. O Covid ha ubierto una nueba crisis, que ye una oportunidaz ta que l’aragonesismo nos arroclemos ta adautar-nos ta ra nueba situazión. Dende Estau Aragonés, queremos continar treballando dende a Compleganza enta a Sobiranía y o Sozialismo.

Entalto Aragón!!!

,

Los Comentarios están cerrados