Qué femos?


Con enchaquia de l’omenache a Chuan  de Lanuza de cada bente d’abiento, teniemos una charrada informal os compañers que mos bi achuntemos.

Os compañers emigraus en Cataluña mos contoron que astí as chens de as CUP ya son pensando en as estratechias cara ta las eslezions munizipals de 2015, irán solencos, profes. Os que somos en o país fa tiempo que dezidiemos priorizar as eslezions munizipals antis que mesmo as autonomicas, una miqueta, ye menister almitir-lo, inspiraus por as CUP.

Pero en Aragón mos trobamos con una situazión diferén. Astí se ye charrando de a posibilidá de que se fese una mena de “Frente Popular” adibindo CHA y IU, entre otris, continando con o pauto que ya fazieron ta las eslezions chenerals: “La Izquierda de Aragón”.

Cómo negar-mos a participar en un proceso d’ixa mena? Si habese un autentico “Frente Popular” en Aragón malo sería que Estau Aragonés no bi estase, tal cual lo de 1936. Pero, ye reyalista pensar-lo?
A primera custión ye a esferenzia entre eslezions chenerals y munizipals y autonomicas. Ta las eslezions chenerals l’alternatiba yera quedar fuera os dos partius, CHA y IU. Asinas que se fazió un pauto repartindo se lo tiempo en o escaño de o Congreso: primero estará lo candidato de CHA 37 meses y dimpués lo candidato de IU la resta de o tiempo. Pero t’as eslezions autonomicas y municipals ye distinto: en Zaragoza bi ha posibilidaz reyals de que un “Frente Popular” se faiga con l’alcaldía: CHA, IU y os demás no pueden no más que repartir-sen o poder, han de aprender a compartir-lo. Ixo lo beyemos, si no imposible de raso, asabelo improbable.

Atro entrepuz ye a situazión de o Conzello. Zaragoza está enronada a deudas. Por qué? Por a suya política de gasto confundiu con “imbersión”. En resumen: por a Expo. A Expo sinificó que solo que ta pagar a espropiazión de a Uerta de Ranillas abió que malbender os terrenos d’Arcosur ta Ibercaja, y regalar-le tot lo bolumen edificador. U siga, inflar a borbolla inmobiliaria. Qué feban CHA y IU? Pos CHA yera qui feba ixa política, ta lo que tenió que forachitar (u “combidar a que marchasen”) a os créticos con a Expo. Entre Ixos créticos yera la chen que dimpués refundó EA. IU teneba la endrezera de as cooperatibas inmobiliarias, y si por ella ese estau, antimás s’ese recalificau mesmo toda la Uerta entre o Cascallo y San Chuan de Mozarrifar, como proposaban PSOE y PP.

Podría ser que ambos partius se arrepentisen de o suyo pasau, pero lo más fázil ye que, consziens de l’estrapaluzio, dixen gobernar a o PP, como dizen ya a escuchetas bels de os suyos mainates.

Pero encara que IU y CHA bricasen istos entrepuzes, bi ha una custión programática, encara que  que no amenista que bolutá política,  creyemos que no nunca trusquirán con ella. Porque en o fundo, lo programa político que puede fer-se en reyalidá ye asabelo alcorzau y mugau por a situazión finanziera de as instituzions publicas, locals u atonomicas, en ixo almitimos que no mos podemos meter furos. Pero con as diputazions probinzials sí.

Somos de raso combenzius de que IU y CHA son, digan o que digan, dos partius de o Rechimen, que nunca no aprebarían boicoteyar as diputazions probinzials d’Aragón, negando-sen a trigar diputaus probinzials d’ixe ipotetico “Frente Popular Aragonés” y aforzando a l’Alministrazión Zentral a fer d’Aragón una Comunidá Uniprobinzial.

Allora, Estau Aragonés no refusamos un “Frente Popular Aragonés”, pero solo que podemos treballar, parando cuenta de a reyalidá, con a ipotesis de que  no bi ha condizions ta que se forgue ta 2015, y por tanto solo que pensamos en presentar una candidatura unitaria de a cucha nazionalista aragonesa, alredor de Religada Nazionalista.

R. Fleta

Secretaire d’Organizazión d’Estau Aragonés

, ,

Los Comentarios están cerrados