O nuestro treballo: fer pacha entre sozialismo y patriotismo.


       Aormino gosan preguntar cómo se puede ser “nacionalista y de cuchas”, considerando se que ixo ye una contradizión. Ixa ideya surte de o leninismo, que considera que o nacionalismo ye una ideya burguesa, surtida en o sieglo XIX. Sindembargo, lo leninismo se puede dizir que fa trampa, pues esferenzia “patriotismo” de “nacionalismo”, y asinas tenemos a “Gran Guerra Patria” que yera o nombre que le daba Stalin a la Segunda Guerra Mundial.

       Sindembargo, patriotismo u nacionalismo surten de bez, y se pueden considerar parabras alto u baxo sinonimas. A esferenzia que os leninistas fan d’ellas surten más de os suyos prechuizios ideyolochicos que no de a reyalidá.

       O patriotismo surte entre os burgueses de o sieglo XVIII, que s’eban feito ricos con os negozios, pero encara no eban conseguiu sacar a l’aristocrazia de o suyo status de clase dominán. O patriotismo s’entendió como o compromís con a chen, con os tuyos pariens, amigos y bezins, ta esfender os intreses coleutibos, dica o punto de chugar-se a propria fazienda, a onor y mesmo a propria vida. O patriotismo estió a ideya que sacó a os burgueses de as suyas casas, bien coflaus en as suyas cadieras  ta, arriesgando as suyas bidas y os suyos diners, combertir-sen en reboluzionarios.

       Asinas, o patriotismo formó parti de as balors de a Reboluzión Liberal, fazió de a burguesía una clase reboluzionaria y dio sentiu a o lema “Libertá, Igualdá, Fraternidá”.

       Sindembargo, a soziedá surtida de a reboluzión burguesa ascape amostró as suyas escontradizions:  A burguesía pilló lo pusto de l’aristocrazia como clase dominán, o debandito lema quedó como una parola bueda y o patriotismo estió lo discurso ta engañuflar a o pueblo ta que asumise o suyo papel subalterno debán de a burguesía. Con a burguesía y l’acumulazión de capital que feba lo libre comerzio, a mayoría de a chen quedó sin de fazienda. Surtió lo proletariau, a chen que treballaba duro de sol á sol t’aconseguir no más que lo chusto ta vivir.

       Asinas, o proletariau ye ixa clase de presonas que “no tienen cosa que perder, solo que  as suyas cadenas”, u siga, chen que no más tien a suya fuerza de treballo, y a de os suyos fillos, a prole, como mercanzía ta bender-ne, ye chen sozmesa coleutibamén a la burguesía. En ixas zircustanzias, o patriotismo no tien denguna balor.

       O proletariau -os treballadors acostumbraus a treballar duro sin tartir, a sufrir a dolor fisica pues “si no treballas no minchas”, aborrezius d’una vida sin de futuro- s’embrecó en fer a suya propria reboluzión, a sozialista, ixa que considera que o capital no ha de ser propriedá d’uns pocos, sino lo bien sozial sobre lo que, i ficando treballo, s’aconsigue endrezar a produzión y a reproduzión de a soziedá. O suyo lema yera lo internazionalismo. No teneban cosa, ni dreitos ni fazienda ni onor denguna. Yeran dispuestos a morir dreitos antis que continar esclabos achenullaus.

       Sindembargo, en muitos años, en a Europa dezaga la Segunda Guerra Mundial ixas dos ideyas, o liberalismo y o sozialismo han combibiu y han construito lo que clamamos “Estau de o Bienestar”, os sozialistas lo beyeban como un camín enta o sozialismo, y os liberals como una mena d’ebitar una reboluzión. Os treballadors y os burgueses constituyeron una “clase media” de feito, pues os treballadors consiguieron os suyos dreitos por os que beniban luitando.

       D’atra man en bels países, a chen s’achuntaba y se beyeba como “nazión sin d’estau”, consideraban que os suyos Pueblos eban estau amarguinaus u mesmo minchaus por grans Estaus plurinazionals que no reconoxeban ixa condizión, surtiban mobimentos de liberazión nazional u patrioticos d’endrezera sozialista u comunista. Recloxidaban ixas biellas ideyas patrioticas de a burguesía, apachandolas con as sozialistas de a clase treballadera.

       Güe, una chen anomenada “neoliberals” u “os mercaus”, son embrecaus en esboldregar ixe Estau de o Bienestar. Güe a clase treballadera si que tien bella cosa más que perder que no as suyas cadenas: tien dreitos que ha d’esfender.

       Igual que a burguesía de o sieglo XVIII, ha plegau en un ran de bienestar que ha d’esfender, si no quiere que a oligarquía finanziera les ne furte ta continar exerzendo la suya echemonía. Patriotismo y sozialismo tornan a estar chuntos atra bez. Si os aragoneses no queremos que a nuestra patria milenaria se beiga, atra bez, minchada por a España Imperial, hemos de dixar-mos de fatezas, de biellas pezquinas, de “custions presonals” que no plegan enta dengún puesto y fer serbir o nuestro patriotismo, a nuestra chenerosidá, a nuestra capazidá de sacrifizio y o nuestro sozialismo, a nuestra esfensa de os dreitos sozials y a nuestra luita contra la oligarquía finanziera mundial.

       Hemos d’achuntar-mos sin miedo de dizir que solo que a soberanía de o pueblo y o sozialismo en libertá mos fan onra á os aragoneses y á Aragón.

       Rafel F.

, , , , , , ,

Los Comentarios están cerrados