O Gubierno d’Aragón en o ran cultural no ye que una delegazión. No irradia cosa de politica cultural-lingüistica y muito menos exerze una politica proautiba de proteuzión u potenziazión d’a reyalidá soziolingüistica que debe almenistrar. D’astí que a situazión reyal d’Aragón siga la d’un país monolíngüe á toz os efeutos, que no sigan en o ran famillar u local, y que ixe suposato trilingüismo no responda que a una situazión ideyal, que aguardamos en un esdebenidero prosimo fesable.

O Castellán ye teunicamén una luenga forana, anque charrata en Aragón dende fa asabelo de sieglos: dende que l’elite cultural aragonesa rebló debán d’a suya supremazía cultural, cuan Aragón encara yera constituzionalmén un Estau, y que en os sieglos XIX y XX estió afincata con o funcionariato alministratibo y educatibo d’o Estato nazionalista centralista español.

O Catalán perén ha formato parti d’Aragón y perén se charrará en os cabos d’a nuestra tierra. Tamién muito localizato á ran famillar y local, partizipa sin dembargo d’a influyenzia, d’a relazión y d’o sentito d’unidá d’una luenga, d’o trallo común d’o Catalán, por lo que i sobrebibirá a pesar de bellas prebatinas negazionistas sobre a suya identidá en Aragón.

L’Aragonés, que ye en situazión más gañosa, ye l’unica mesmamén autotona. Feito lingüistico suyizo d’Aragón que li da caráuter de luenga nazional más encara considerando que ye o chustrato d’a luenga charrata en tot Aragón.

A reyalidá más aclamable d’a Luenga nazional d’Aragón ye que dimpués de 30 años de “Poders publicos aragoneses” ha estato innorata y albandonada á la suya suerte. A conserbazión y esembolique d’a Luenga aragonesa, que deberba aber estato iniziatiba, en un estato de normalidá y normalizazión cultural, d’os suzesibos Gubiernos aragoneses, en defeuto de un mobimiento asociatibo y popular d’emparo, ha estau en a prautica bitima d’o desintrés y l’albandono total, cuan no d’a negazión.

Un tiempo trafegato

Son arredol de 25 os años de treballo por parti d’as collas, coleutibos y particulars y o balanze sigue estando encara a esparratada de planteyamientos y a esparratada de boluntaz; o que s’ha traduzito, por a manca d’unión, en a inconsistenzia y a febleza d’o mobimiento d’esfensa de l’aragonés déban d’a soziedá y fren os Poders publicos.

Ye una culpa coleutiba en a que bels han quiesto representar un paper direutor, atros o sentito particularista y muitos más o presonal, que no han feito garra bien á la causa de l’aragonés. Representato en feitos tan sonors como a frustrazión d’iniziatibas tan saludables como a ILP ta una Lai de Luengas, que contrimuestró que o mobimiento por l’aragonés no puede estar capitalizato puliticamén

Masiada ribalidá en ista familla de l’aragonés, que ha suposato un tiempo tresbatiu, en unos años creticos en que a Luenga aberba d’aber-se integrato en as politicas de proteuzión ofizials; os meyos publicos y pribatos de comunicazión y en as rilazions entre o particular y o publico .

Paralelamén eba d’aber-se afincato un “model unificato de luenga”, pero si cualcosa podió senificar en ixe sentito o 1º Congreso ta ra Normalizazión de l’Aragones se puede considerar ya superato por as zercunstanzias ementatas, dica tal punto que estará por beyer lo que queda aprobeitable d’er en o nuebo enanto ubierto.

Chuntos por l’Aragonés

Asinas as cosas, os zaguers 20 años han suposato ta l’aragonés estar en un estau de difizil definizión, pero ixo sí con un mayor ran de conzienciación drento d’o escampo mobimiento de l’aragonés que ha parato cuenta d’a nezesidá urchén de fer cualcosa.

O II Congreso de l’Aragonés eba que aber estato a representazión d’a unidá, u por lo menos d’o más amplo consenso fesable dentro d’o mobimiento de l’aragonés: por un canto, una foto de familla con una acarrazada fraternal entre os suyos miembros y, por atro, una man estendillata entre l’ofizial y o instituzional.

No ha estau ixa la foto de remate. En era bi ha notables ausenzias que denotan que as diferenzias sozsisten y que talmen aiga mancato un compromís reyal con l’ochetibo de remate en bels casos. En cuanto á la parti ofizial y instituzional se poderba dizir que nomás se ye amanata ta beyer o que se cozeba y que no salió combenzita d’o que beyeba u por lo menos, d’aber bisto un auténtico, platero e inrefetable mobimiento d’unidá.

Confitamos que o camín enzetato por Chuntos por l’ Aragonés no se dexe por trancato, encara que cuan a “Academia de l’ Aragonés” enzete os suyos triballos, pos encara queda muito por aunar.

Bellas Rematanzas

O que más ha triballau en contra de l’aragonés y o suyo reconoximiento ofizial ye a persistenzia d’un prechuizio, que parti d’a considerazión que dende o suyo platero caráuter de luenga autotona se desixa a suya esenzia de Luenga nazional y deba amostrar-se en a escuela y normalizar o suyo emplego á lo mesmo ran de como s’amuestran y s’emplegan as luengas propias en atras comunidás d’o Estau español. Os gubiernos d’Aragón bislayan iste poblema, como bislayan cualsiquier atro tema identitario d’alto ran. Ye a medrana pulitica de cutio.

Mientres que atras Comunidás Autonomas han asumito a custión lingüistica independientemén d’o color pulitico d’os suyos gubiernos, en Aragón, encara somos asperando que se faiga d’er una custión miollar d’as puliticas culturals y d’amostranza y se creye á este respeutibe una “Pulitica d’Estato” u cuan menos “de Comunidá Autonoma”. Isto refuerza a nuestra tesis de manca de bafo aragonesista d’os Gubiernos d’Aragón y de que as suyas puliticas lingüisticas, si as tienen, no fan onra á os intreses d’a cuidadanía que almenistran. Encluso dizirbanos más, en son en contra.

A formula “modalidaz lingüisticas” nos parixe un tanto suizida. O modelo local y famillar de luenga ye reblán. En un mundo an os meyos de masas se meten dica lo más fundo d’o territorio y cambian rapidamén os abitos d’as comunidás locals y familiars, cosa permanixe allena. L’aislamiento d’as bals ha rematato. Fa tiempo y ta cutio. A situazión que ha mantenito biba una luenga mientres sieglos puede senificar a suya muerte en un parella de decadas .

O Manifiesto por a Unidá de l’Aragonés proposa asumir o modelo d’os enantos de normalizazión lingüística d’as luengas d’a nuestra redolada que tan grans y güens risultatos lis han dato y que debe materializar-se en adubir ixe model culto y referenzial á lo que ementa. Ye a unica bía d’esdebenidero. Entre ras muitas bentaxas d’aprestar un “model culto y referenzial” ye quitar a l’aragonés d’a suya fuerte dialeutalización; ganar más fabláns sin d’estar amenistablemén adscritos a un deteminato lugar u redolada y, á la bez, carauterizar y refirmar ixa riqueza dialeutal que tanto s’ensiste en conserbar.

Posizions d’ Estau Aragonés

Estau Aragonés apuesta por a unidá d’a luenga, d’os fabláns y d’as asoziazions y presonas que esdefienden l’ aragonés. L’aragonés ha muito a ganar con un autentico mobimiento d’unidá, anque toz reculemos un poquez en as as nuestras posizions.

Estau Aragonés rispeta a independenzia d’o mobimiento d’esfensa de l’aragonés, as suyas asoziazions y as suyas presonas. No se fica ni en os suyas organizazions, ni en os suyos triballos, ni en as suyas rematanzas. Anque se reserba o dreito a opinar en o plan politico por a custión lingüistica en Aragón. Tamién clama á os suyos afiliatos y simpatizansa triballar leyal y onestamén por a unidá d’o mobimento y d’a luenga aragonesa .

Estau Aragonés desixe á lo Gubierno d’Aragón que reconoxca ofizialmén a Luenga aragonesa. Que faiga d’er as puliticas de desarrollo y promozión en a soziedá, os meyos y l’escuela de l’aragonés. Que dexe d’innorar ista reyalidá y autúe como elemento autibo en a normalizazión d’a Luenga. que no aberba d’estar un fautor d’o chuego pulitico, d’a consecuenzia d’una mayoría u d’un pauto entre politicos. A luenga aragonesa ye un elemento cultural alazetal d’Aragón, que forma parti d’a soziedá aragonesa de cutio y, por tanto, ha d’estar consustanzial á las politicas de promozión autiba d’a cultura y de l’amostranza de un gubierno que se diz “aragonés”.

Estau Aragonés ferá serbir (como fan atras asoziazions) en os suyos documentos ofizials, probisionalmén y mientres plega una formulazión ortografica ta l’aragonés, as normas ortograficas de 1987, que benimos emplegando dende ixa calendata y que s’aproboron en o I Congreso de Normalizazión de l’Aragonés, con os cambeos que dimpués s’han adibito consensuadamente profes.

Estau Aragonés rispetará que sus afiliados continen escribindo como millor aduban. Ista postura, como la debandita, no sinifica prener causa politica a fabor d’una u d’atra ortografía.

Estado Aragonés repuntará alcuerdos sobre Luenga aragonesa que sigan “de mayor consenso”; no ye o suyo ochetibo a exerzer “d’entidá lingüistica” y tampoco siñalará direutibas a l’autibidá d’os suyos militans. Profes que cuan o Gubierno d’Aragón señe a endrezera a trabiés de l’asesoramiento d’una Academia d’a Luenga Aragonesa, con os suyos documentos ofizials adempribiaremos ixa ortografía.

Dende Estau aragonés consideramos que a custión no ye en l’ortografía, ni en una “t” de más, u bella “v” de menos; que no bi ha de diferenzias insalbables entre os clamatos patrimonials y os clamatos neofablans y que l’aragonés no puede estar pas ocheto de manullos politicos. L’aragonés ye un feito cultural de primer orden, rasgo lingüistico de toda a Nazión aragonesa, siga como lengua u siga como chustrato idiomatico, que se merexe a unidá y l’esdebenidero y, profes, o consenso de toz os que luiten, lo sientan, l’escriban u lo charren.

Aragón, 29 de chunio de 2007