Archivo etiqueta Nazional

Pedagoxía d’una esferra

11set1Un diya nazional “en negatibo”.- Cada 11 de setiembre Cataluña remera lo suyo “Diya Nazional” u Diada Nacional. As festibidaz zibicas u d’aponderazión patriotica naxen de bella bisión romantica d’a istoria d’os Pueblos dillá por o sieglo XIX, como ideya de que bi ha bels feitos en a istoria d’un país á los que lis se puede atribuyir prou bistera ta reforzar una pertenenzia u bella conzienzia común. Lo dito, una bisión de raso romantica, pero que funciona. A particularidá de l’11 de setiembre en Cataluña ye que ye una d’as poquetas enchaquias en que a zelebrazión s’alazeta en una rebesada: una esferra melitar. Una graniza esferra que arrambló con as instituzións puliticas istoricas d’o Prenzipato. O feito que siñala lo fin de Cataluña como entidá pulitica y soberana. Ye un caso estranio, profes, y, dito por os mesmos catalans, con un brin masoquista. Á ormino se cloxidan os aspeutos positibos d’a istoria d’o país, bitorias u los digamos,”cambeos a millor”, pero lo contrario no ye pas cutiano.

O que amuestra una esferra.- Pero lo feito de remerar una esferra tiene un platero oxetibo pedagoxico, aquer de poder mantener una conzenzia pulitica sobre os suyos efeutos y meter os alazez d’una azión pulitica orientata a la superazión d’as suyas consecuenzias: recuperar o status d’antis de l’esferra; recuperar as instituzions soberanas, u en un luengache más esauto, recuperar a independenzia. Isto l’asume lo Pueblo catalán y ye en a radiz de l’esito d’as mobilizazions independentistas de l’11 de setiembre. Una esferra ye una endominia, pero conmemorar-la talmén te fa más rebindicatibo y más presto a movilizar-te. Si no estase asinas, no se poderba contar con l’esito de partizipazión que s’ha bisto dica agora en ixas combocatorias.

No bi ha un diya ofizial ta ro patriotismo aragonés.- Remerar a istoria y no xuplidar-se’n nunca, ixe ye ro prenzipal sentiu d’ixa festibidá catalana. No bi ha en Aragón cosa parellana á una “Fiesta nazional aragonesa”, una Diyada Nazional d’Aragón, nomás un “esbafato” y tasamén rebindicatibo, sin garra conteniu pulitico, “San Chorche” (Santo patrón antimás d’una ripa de países uropeyos) que ni por acucuto puede comparar-li-ne. Os nazionalistas aragoneses remeramos o no-ofizial (anque poderba fer as begadas) 20 d’Abiento, diya d’a execuzión de Chuan de Lanuza, o Chustizia d’Aragón que se concaró con o rai Felipe II en 1591. ¡Jolio, que no mos mancan estronchinatas ni esferras en a nuestra istoria que mos poderban fer o paper d’un 11 de setiembre á los catalans!. Sin dembargo, no remeramos ufizialmén dengún feito que pasase entre 1707 y 1714. Ni sisquiera una bitoria, a batalla de Zaragoza (u de Torrero) en 1710 con a que Aragón recuperé os suyos fuers por un breu espazio de tiempo. Siga porque á los aragoneses mos agana xuplidar ascape ros “malos gotarrons” y os suyos protagonistas, siga porque aparentemén mos emos trasquiu ro punto de bista d’os benzadors, cualcosa nos leba á considerar á los fillos d’ista tierra que luitoron contra os Borbons y por a perduranzia d’as instituzións soberanas d’o Raino d’Aragón, como aliens á nusatros y á lo nuestro presén pulitico. En 300 añadas no emos pensau en onrar cosa á los nuestros erois d’a Iª Guerra d’o Franzés, tamién clamata de “Suzesión española”. ¡Qué menos que aber-lo feito bella begata por qui esfendión con as suyas bidas os fuers y as libertaz d’a nuestra tierra! En o sitio de Barcelona d’o 1714, bi eba soldaus aragoneses, que ni eban reblau, ni eban quiesto estar budatos d’allí y que luitón en as suyas murallas dica ras acabanzas y por as libertaz d’Aragón y d’a Corona d’Aragón. Son erois que nos pueden amostrar que a resistenzia nunca ye bofa y son testimonio y enchaquia ta que as chenerazions d’aragoneses, autuals y esbenideras, tiengan esmo ta luitar por o suya libertá.

A istoria como pedagoxía d’a libertá.- Os aragoneses no emos feito garra pedagoxía d’a nuestra istoria. No emos aprendiu cosa d’as nuestras esferras. Os benzedors mos imposaron a suya bersión d’a istoria: “Toz ganamos si os aragoneses renunziaz á los buestros biellos dreitos y tos gubernamos con as lais d’a benzedora Castiella borbonica”. ¡Y ya lo creigo que nos l’han feito trasquir! Nos dizión que yera cosa grandiza a unión a una Castiella, ta fer cualcosa muito güena clamata España. ¡Castiella, mesmamén a tradizional, a más zerrina, terne y “unica” enemiga d’as libertaz de Aragón!. Ye l’unico país que mos ha embadito y que s’ha quedau. Pero Aragón no ye Castiella. L’angluzia d’esbandidura de Castiella no ye pro ta chunir cosa. A tradizión pulitica d’Aragón y d’a Corona de Aragón ye en as antipodas de Castiella-España. No se puede chunir o zielo con a tierra ni l’azaite con l’augua, sin fer-ne una borustaca. Nomás l’espansionismo castellán enta ra Corona d’Aragón esplica l’Estau español autual. Cosa más. Nunca abié un auto d’unión consentiu por o Pueblo aragonés, sino que un esclatero y de raso ilegal y soberbioso auto d’imposizión y d’allanazión d’os nuestros dreitos. Semos charrando de fa 300 añadas y encara güei Castiella-España ye en o mesmo plan; centralismo, absolutismo (agora ye absolutismo constitucional esfrazato de democrazia) y legalismo a machamartillo: Tu charrarás en lo que nusatros te digamos, a tuya economía será a que nusatros queramos, a tuya pulitica la que te dexemos fer, os tuyos impuestos os amenistraré yo, ezetra. Antis yera lo Consello de Castiella, güei o Gubierno d’España, pero sigue estando ro mesmo, contina rainando un Borbón, atro más. Pero agora empezipiamos á prener conzenzia de que l’esferra istorica d’a nuestra nazión en 1707, ye l’orixen de toz os mals modernos d’Aragón. Dende allora semos chusmesos á l’espolladura contina d’ os nuestros cabals esprituals, materials, puliticos y culturals como Pueblo, con l’unico oxetibo de querer rancar-nos a nuestra conzenzia d’aragoneses libres, bibindo en un Aragón libre. Güei ya nomás confitamos en l’unico que nos queda, o nuestro triballo y o nuestro indibidualismo, entre condeszendiens y aconortaus, lebando ro nuestro esistencialismo etnico á caramanchons, gubiernatos como somos por unos puliticos locals de raso chusmesos á lo zentralismo, chestors d’ixe nuebo corregimiento borbonico que se fa á clamar “Comunidá Autonoma d’Aragón”, an de contino fan prebatina d’a incheniería sozial d’o españolismo ta fer d’os aragoneses chusmesos y asimilatos y rainando un monarca deszendién d’una saga d’absolutistas bengatibos y despoticos, á los que a Istoria nunca ha conseguido fer-los jopar definitibamén d’España.

Refer-se á lo españolismo en a nuestra tierra.- Como comunidá umana, os aragoneses semos os ereders d’a nuestra istoria. Nazión zibica que ha bibito 1000 añadas dentro d’as mesmas mugas y ereders d’o que estioron y construyeron ta ers, y profes ta nusatros, os aragoneses de sieglos pasaus. Tamién d’una forma propria de gubierno y d’a soberanía que espleitón mientres 700 añadas. Debemos y podemos buscar rispuestas en a nuestra istoria. Queremos trobar-las, anque ye esclatero que mos fa zerina (porque a rispuesta poderba estar, plantando cara á l’españolismo, tamién a independenzia) u talmen encara femos as cosas con bergoña (¡no mos se’n baigan á arreguir por aimar un Estau proprio, nusatros pobrez baturros!) Semos muito aclapatos por l’españolismo, perén estirau y muito repinchato en Aragón; un españolismo forano, soberbioso, fachendoso y castellán, que mos tiene á los aragoneses de reyens en a nuestra tierra y que ya no amaga que quiere fer d’Aragón ribazera, balluarte u mesmo muga y muro de contenzión, debán d’o que ye pasando en Cataluña. Bistas as cosas, se repleca ra situazión: ye difízil fer pedagoxía en Aragón sobre os dreitos coleutibos nazionals de nusatros, charrar sobre l’exerzizio d’as antiguas libertaz d’os aragoneses u fer omenaches á los erois que las esfendión. Debantar y emparar istas ideyas, ta que a chen lis dé refirme, fan una zuña á la reata españolista. Contino te surtirán á lo trango los “corregidores borbónicos” locals, señeros puliticos españolistas d’a nuestra tierra, os melitans aliberatos u criptomelitans mesos en todas as dempas que con l’aduya d’os sendicatos ultras d’a negazión, rebestius d’asoziazions culturals, te engaronarán con os suyos argumens negazionistas, fatos y ofensibos, que preban falsiar a conzienzia sobre la nuestra historia y a nuestra cultura. Ixos que si no te combenzen t’esacraitarán, ta bier si reblas, t’aborrezes y te sacan d’o zircuito cultural y pulitico.

Redotaus puede, pero con recordanza y con ganas de dixar d’estar-ie.- Remerar una esferra ye lo millor antidoto contra l’asimilazión. Esferrato sí, pero zereño con combizión, dica que plegue un tiempo más propizio. Ta ros catalans ixe tiempo parixe aber plegato, en er son triballando… Os aragoneses encara somos luen, pero bel diya talmén saldremos enta la carrera a contrimuestrar, á ixena o fendo cualsiquier letra de l’abezedario, nuestro refirme a un Aragón libre y soberano.

¡Redotados, pero nunca xublidaus por o Pueblo! ¡Onor y gloria ta los aragoneses cayius en as murallas de Barcelona l’11 setiembre de 1714! ¡Aragón no rebla!

, , , , , , , , ,

No hay Comentarios

Estau Aragonés debán de la demanda de Marco Aragonés de Relazions Laborals.

 

Estau Aragonés ye un partiu sozialista. Ixo sinifica que somos partidarios de que o Capital ha de considerar-se como un bien sozial, no pas como una propiedá pribada, consideramos que o mercau no puede ser libre, de feito nunca lo ye, sino endrezau, regulau; que si o mercau queda como prenzipal sistema d’asinazión de recursos, l’acumulazión de capital (“riqueza”, “diners”) en pocas mans ye feita, y con ella se plega en as explotazions sozials y opresions nazionals, que cutio marchan de conchunta.

Estau Aragonés ye un partiu nazionalista. Ixo sinifica que identifica a o Pueblo Aragonés como nazión. O Pueblo Aragonés ye una comunidá humana identificada por toz os nuestros bizins, con as mesmas mugas dende fa 700 años; tenemos a nuestra propria luenga nazional, l’aragonés, encara que cuasi amortada por o prozeso colonial español; mantenemos a nuestra cultura nazional, como trazas proprias de relazionar-mos dentre nusatros, no pas como mero merchandising;  tenemos a nuestra reyalidá economica propria, encara que sozmesa á la explotazión economica colonial, dependién, tanto de os nuestros recursos naturals como umans; dependenzia colonial que mos fa sufrir encara más l’autual crisis.

Profes que consideramos, como sozialistas, que a superazión de o capitalismo no puede fer-se serbir en una nazión chicota y solenca, por ixo, como partiu, prebamos de construyir alianzas internazionals, que sinfiquen zereños ligallos en a nuestra endrezera, asinas ye menister enterder a nuestra partizipazión en RSE. Manimenos, somos consziens de que a espezial relazión colonial que sufre Aragón, fa que a emanzipazión social, se beiga de raso identificada con a liberazión nazional.

A luita de clases en Aragón no ye tal cual se puede beyer en un capitalismo clasico: a clase dominán en Aragón no reside en Aragón.  No ye una “clase dominán” en o sentiu marxista, más bien ye una “casta de burocratas”, que mandan asabelo aquí, pero penden de raso de os autenticos mainates capitalistas, residens en Madrid, alredor de o Monarca Español. Bien se bale que o Rey d’España ye aristocrata, pero en reyalidá ye lo primer burgués d’España: no paga impuestos e imbierte a suya fortuna presonal como le peta, él y os “empresarios del régimen”: botines, koplowitzes, albertos… Os negozios internazionals de o Rey y a suya corte burguesa creyan a cupula de a clase dominán española que explota os nuestros recursos, como se puede beyer en o caso de La Muela, a urbanizazión de o Pirineu, u a industrizazión alredor de Opel. Ye menister beyer bien platero que o benefizio de a colonizazión alcanza no sólo que a os empresarios achuntaus con os colonialistas, sino tamién a funzionarios, emplegaus y mesmo treballadors que son alredor d’istos negozios, tanimientres que marguina no sólo que á la mayoría de os treballadors aragoneses, sino tamién a os pequeños empresarios, autonomos, de o campo, a industria u os serbizios, que’n son fuera de toz istos negozios fuscos.

A relazión colonial no chenera una luita de clases tal cual se beye en o capitalismo clasico, sino que ixa luita ye, en bella mida, trasversal, por ixo as luitas anticolonials, de liberazión nazional, ta trunfar, han de ser tamién trasversals: han d’achuntar a tot lo Pueblo Treballador (conformau por qui no ye cooptau por a casta de mainates), clase obrera y capas meyas, en contra de a opresión y a explotazión, asinas ha de beyer-se a nuestra alianza con Tierra Aragonesa.

A debandita relazión colonial, chenera uns problemas concretos, de carauter nazional aragonés. Ta encarar-mos con istos problemas, surte a reibindicazión de o “Marco Aragonés de Relazions Laborals”.

A respuesta federalista.

Fa años que se beye platero que toda la estrutura alredor de o que se clama “Concertación Social” no achusta con os intreses populars aragoneses, os combenios coleutibos se negozian por burocrazias estatals, tanto sindicals como patronals, sostenidas por subenzions de l’Estau qui fa serbir as relazions laborals como una pieza más de o sistema colonial. Ye de dar que cada bez más os aragoneses se beigan más fuera de toda ista comedia.

Una propuesta ta prebar de trencar ista situazión ye o “Marco Aragonés de Relazions Laborals”, entendiu como un proyeuto ta enamplar a capacidá lechislatiba de as Cortes d’Aragón y que istas diseñen un Sistema de Protezión Sozial Aragonés, con a una Lei Aragonesa de Treballo, a creyazión de a Prebisión Aragonesa de Treballo, Programas Contra las Infrazions Laborals proprios  y, en concreto, a chestión dende a Diputazión Cheneral d’Aragón de as prestazions y subsidios d’ature, o FOGASA, a formazión continua de os treballadors y os suyos programas especificos, a Inspezión de Treballo, a regulazión de as Mutuas d’Azidens, os permisos de treballo ta inmigrans y a creyazión d’un SMI aragonés.

Iste bienintenzionau programa ye asumiu de raso por o federalismo sozialdemocrata que representa CHA. No hemos de negar que sería asabelo bueno que s’enzetasen as reformas debanditas, o problema ye que os partius de a Restaurazión Borbonica s’oposan de raso, pues iste programa sinifica custionar, encara que no más siga sobre o papel, a suya echemonía economica, sozial y politica. A Burguesía Española, tal cual os suyos monaguillos aragoneses, refusa de raso lo federalismo. Ta ellos un federalista ye tan enemigo de l’Estau como un independentista.

Asinas, prou que Estau Aragonés saludará como positibas todas as reformas que se fayan en ista endrezera, y en espezial anima a las organizazions sindicals a demandar que Aragón siga l’ambito de a suya negoziazión coleutiba; manimenos somos consziens de que a consecuzión d’iste marco aragonés de relazions laborals, encara que surte como demanda debán de as inchustizias surtidas de a nuestra dependenzia colonial como nazión, sólo que s’ha de conseguir per meyo de a proclamazión unilateral de a Republica Aragonesa por as Cortes d’Aragón, y isto sólo que puede aconseguir-se arroclando fuerzas plurals, anticolonials y transbersals, y amarguinando maximalismos ideyolochicos, con ixe unico oxetibo.

 

, , , ,

No hay Comentarios