Archivo etiqueta Olibera

Enta una Olibera Aragonesa?

En a mayoría de as Lechislaturas, Aragón ha teniu un diputau en o Congreso d’España diferén de os partius de a II Restaurazión Borbonica, cutio por a zircunscrizión de Zaragoza, do s’en trigan siete y por ixo, con no más que un 12% de os botos se puede ficar un diputau. Dende 1977, PSA, PAR, IU u CHA en han teniu un representán proprio, en o Grupo Misto u integrau en unatro.
Tener un diputau independién de PP y PSOE ye una fita importán ta o desembolique de a nuestra identidá como Pueblo: Aragón no ye una comunidá artificial, como as castellanas, Aragón ye un país con a suya propria identidá. Puestar que isto mos parixca un paset chicorrón enta la soberanía, pero mesmo lo camín más largo se prenzipia con un primer paso.
Fa pocos diyas, una colla de militans de CHA, alticamaus por a situación de o suyo partiu, ha feito publica una propuesta ta un referéndum dentro de CHA, ta lo que son replegando siñaduras: Quieren enzetar una coalizión ampla cara ta las eslezions chenerals, que pueda integrar-ie mesmo a IU u Equo (y atros), ye una ideya que ya surtió fa años en CHA y que enreliga con aquel Olivo Italiano que surtió zaga la disoluzión de o PCI y que remató en o PD autual. Asinas güe le dizen Olibera Aragonesa, encara que os debaditos militans de CHA zeñan como referén más a o BNG que a o PD.
Estau Aragonés no se cansará de gritar ta la chunta de toz os sobiranistas aragoneses en una plataforma común, pero ixo no sinifica que disprezie una futurible plataforma encara más ampla. Aluframos con ficazio lo proceso enzetau por ista colla de militans de CHA y charraremos de l’afer en a nuestra benién asamblea de o diya 25 de setiembre, si mos plega una propuesta concreta, la estudiaremos.
Ixo sí, si la propuesta no ye ubierta de raso y no se guaranzia la presencia de o previsible diputau en asambleyas de simpatizans do se i esplique lo treballo en Madrid y s’ascuite a la chen, pueden escusar-sen de i combidar-mos. No seremos nusatros qui refirmemos un apaño entre mainates.

, , , , ,

No hay Comentarios